فرزانہ خان نیناںؔ

چاندنی کے ہالے میں کس کو کھوجتی ہو تم

چھپ کے یوں اداسی میں کس کو سوچتی ہو تم

بار بار چوڑی کے سُر کسے سناتی ہو

شور سے صدا کس کی توڑ توڑلاتی ہو

بزم میں بہاروں کی کھوئی کھوئی لگتی ہو

دوستوں کے مجمع میں کیوں اکیلی رہتی ہو

موج موج بہتی ہوآنسوؤں میں رہتی ہو

جھالروں سے پلکوں کی ٹوٹ ٹوٹ جاتی ہو

بلبلے کی صورت میں پھوٹ پھوٹ جاتی ہو

دھند سے لپٹ کر کیوں سونی راہ تکتی ہو

کھڑکیوں سے برکھا کودیکھ کر بلکتی ہو

سارے سپنے آنکھوں سے ایک بار بہنے دو

رات کی ابھاگن کو تارہ تارہ گہنے دو

ماضی، حال ،مستقبل،کچھ تو کورا رہنے دو

پُل کے نیچے بہنے دو آنسوؤں کی یہ ندیاں

وقت چلتا جائے گا بیت جائیں گی صدیاں

بے حسوں کی بستی میں بے حسی کو رہنے دو

دل تو پورا پاگل ہے اس کو پورا رہنے دو

یہ جو کہتا رہتا ہے اس کو بھی وہ کہنے دو

اس کو کورا رہنے دو

تم یہ کورا رہنے دو۔۔۔!!!

Read More

اجملؔ سراج

سو طرح کے غم اور ترے ہجر کا غم بھی

کیا زندگی کرنے کے لئے آئے ہیں ہم بھی

ہاں اس کا تقاضہ تو فقظ ایک قدم تھا

افسوس بڑھا پائے نہ ہم ایک قدم بھی

اک رنجِ تعلق ہے کہ جتنا ہے بہت ہے

اک درد محبت جو زیادہ بھی ہے کم بھی

یہ ذکر ہے جس شہر کا ا ب کس کو بتائیں

کچھ وقت گزار آئے ہیں اس شہر میں ہم بھی

اس روز جب اس شہر میں اک جشن بپا تھا

ہم نے تو سنا ہے کہ کوئی آنکھ تھی نم بھی

اجملؔ سراج

Read More

رئیس امرہوی

کس کا جمالِ ناز ہے جلوہ نما سو بہ سو

گوشہ بگوشہ در بدر قریہ بہ قریہ کو بہ کو

اشک فشاں ہے کس لئے دیدۂ منتظر میرا

دجلہ بہ دجلہ یم بہ یم چشمہ بہ چشمہ جو بجو

میری نگاہِ شوق میں حسن ازل ہے بے حجاب

غنچہ بہ غنچہ گل بہ گل لالہ بہ لالہ بو بہ بو

جلوہ عارض نبی رشک جمال یوسفی

سینہ بہ سینہ سر بہ سر چہرہ بہ چہرہ ہو بہ ہو

زلف دراز مصطفی گیسوئے لیل حق نما

طرہ بہ طرہ خم بہ خم حلقہ بہ حلقہ مو بہ مو

یہ میرا اضطراب شوق رشک جنون قیس ہے

جذبہ بہ جذبہ دل بہ دل شیوہ بہ شیوہ خو بہ خو

تیرا تصور جمال میرا شریک حال ہے

نالہ بہ نالہ غم بہ غم نعرہ بہ نعرہ ہو بہ ہو

بزم جہاں میں یاد ہے آج بھی ہر طرف تیری

قصہ بہ قصہ لب بہ لب خطبہ بہ خطبہ رو بہ رو

کاش ہو ان کا سامنا عین حریم ناز میں

چہرہ بہ چہرہ رخ بہ رخ دیدہ بہ دیدہ دوبہ دو

عالم شوق میں رئیس کس کی مجھے تلاش ہے

خطہ بہ خطہ راہ بہ راہ جادہ بہ جادہ سو بہ سو

رئیس امرہوی

Read More

مسعود قاضی

ٹوکتے ھیں ھمیں ۔۔۔۔۔۔۔۔۔۔ کھڑے ھوکر

طِفل کیا ھوگئے ؟؟؟ ۔۔۔۔۔ بڑے ھوکر

اپنی وقعت ۔۔۔۔۔۔۔ نہ کرسکیں گے بحال

اب تو ھم ۔۔۔۔ موتیوں جڑے ھوکر

وقت ۔۔۔ مرنے تلک گزارنا ھے !!

ایک کونے میں اب پڑے ھوکر

اُمٌت ِ واحدہ کہیں کس کو ؟؟

بٹ گئ ھے جو ۔۔۔سو دھڑے ھوکر !!

دیکھ لو عازمین ِ جنت کو

پھٹ گئے ہیں ۔۔۔۔۔۔۔ وہ لوتھڑے ھوکر

بات سچٌی جہاں کہے مسعود

مُونھ لٹک جایئں ۔۔۔۔۔ تھوبڑے ھوکر

مسعود قاضی

Read More

راحت اندوری

لوگ ھر موڑ پہ رُک رُک کے سنبھلتے کیوں ھیں

اتنا ڈرتے ھیں تو پھر گھر سے نکلتے کیوں ھیں

میں نہ جگنوھوں، دیا ھوں نہ کوئی تارا ھوں

روشنی والے میرے نام سے جلتے کیوں ھیں

نیند سے میرا تعلق ھی نہیں برسوں سے

خواب آ آ کے مری چھت پہ ٹہلتے کیوں ھیں

موڑ ھوتا ھے جوانی کا سنبھلنے کے لیئے

اور سب لوگ یہیں آ کے پھسلتے کیوں ھیں

میکدہ ظرف کے معیار کا پیمانہ ہے

خالی شیشوں کی طرح لوگ اُچھلتے کیوں ھیں

راحت اندوری

Read More

عرفان صدیقی

بدن کے دونوں کناروں سے جل رہا ہوں میں

کہ چھو رہا ہوں تجھے اور پگھل رہا ہوں میں

تجھی پہ ختم ہے جاناں، مرے زوال کی رات

تو اب طلوع بھی ہو جا کہ ڈھل رہا ہوں میں

عرفان صدیقی

شعلہٴ عشق بجھانا بھی نہیں چاہتا ہے

وہ مگر خود کو جلانا بھی نہیں چاہتا ہے

اس کو منظور نہیں ہے مری گمراہی بھی

اور مجھے راہ پہ لانا بھی نہیں چاہتا ہے

میرے لفظوں میں بھی چھپتا نہیں پیکر اس کا

دل مگر نام بتانا بھی نہیں چاہتا ہے

عرفان صدیقی

تیرے تن کے بہت رنگ ہیں جانِ من، اور نہاں دل کے نیرنگ خانوں میں ہیں

لامسہ، شامہ و ذائقہ، سامعہ، باصرہ، سب مرے رازدانوں میں ہیں

اور کچھ دامنِ دل کشادہ کرو، دوستو شکرِ نعمت زیادہ کرو

پیڑ، دریا، ہوا، روشنی، عورتیں، خوشبوئیں، سب خدا کے خزانوں میں ہیں

ناقہٴ حسن کی ہم رکابی کہاں، خیمہٴ ناز میں بازیابی کہاں

ہم تو اے بانوئے کشورِ دلبری پاس داروں میں ہیں، ساربانوں میں ہیں

میرے اندر بھی ہے ایک شہرِ دگر، میرے مہتاب، ایک رات ادھر سے گزر

کیسے کیسے چراغ ان دریچوں میں ہیں، کیسے کیسے قمران مکانوں میں ہیں

اک ستارہ ادا نے یہ کیا کر دیا، میری مٹی سے مجھ کو جدا کر دیا

ان دنوں پاؤں میرے زمین پر نہیں، اب مری منزلیں آسمانوں میں ہیں

عرفان صدیقی

Read More

احمد سلمان

ہم پہ گزرے تھے رنج سارے جو خود پہ گزرے تو لوگ سمجھے

جب اپنی اپنی محبتوں کا عذاب جھیلے تو لوگ سمجھے

وہ جن درختوں کی چھاؤں میں سے مسافروں کو اٹھا دیا تھا

انہی درختوں سے اگلے موسم جو پھل نہ اترے تو لوگ سمجھے

اس ایک کچی سی عمر والی کے فلسفے کو کوئی نہ سمجھا

جب اس کے کمرے سے لاش نکلی خطوط نکلے تو لوگ سمجھے

وہ خواب تھے ہی چنبیلیوں سے سو سب نے حاکم کی کر لی بیت

پھر ایک چنبیلی کی اوٹ میں سے جو سانپ نکلے تو لوگ سمجھے

وہ گاؤں کا اک ضعیف دھقاں سڑک کے بننے پہ کیوں خفا تھا

جب اس کے بچے جو شہر جا کر کبھی نہ لوٹے تو لوگ سمجھے

Read More

سراج اورنگ آبادی

گلشنِ عالم میں آسائش نہیں

یہاں گلِ عشرت کی پیدائش نہیں

صاف دل کوں ہے نمد پوشی سیں کام

آرسی کوں ذوقِ آرائش نہیں

کیوں نہ تجھ قد کوں کہوں سرو سہی

راست ہے کچھ اس میں بالائش نہیں

رحم کر تقصیر میری کر معاف

کیا گنہہ گاروں کو بخشایش نہیں

دل میں رہتا ہے خیال اُس یار کا

غیر کوں اِس گھر میں گنجائش نہیں

کون سا دم ہے کہ جاناں بن سراج

شوق کے شعلوں کوں افزائش نہیں

Read More

منظر بھوپالی

ان کو آنسو بھی جو مل جائیں تو مسکاتی ہیں

بٹیاں تو بڑی معصوم ہیں جذباتی ہیں

اپنی خدمت سے اُتر جاتی ہیں دل میں سب کے

ہر نئی نسل کو تہذیب یہ سکھلاتی ہیں

ان سے قائم ہے تقدس بھی ہمارے گھر کا

صبح کو اپنی نمازوں سے یہ مہکاتی ہیں

لوگ بیٹوں سے ہی رکھتے ہیں توقع لیکن

بٹیاں اپنی برے وقت میں کام آتی ہیں

بٹیاں ہوتی ہیں پُرنور چراغوں کی طرح

روشنی کرتی ہیں جس گھر میں چلی جاتی ہیں

اپنی سسرال کا ہر زخم چھپا لیتی ہیں

سامنے ماں کے جب آتی ہیں تو مسکاتی ہیں

بٹیوں کی ہے زمانے میں انوکھی خوشبو

یہ وہ کلیاں ہیں جو صحرا کو بھی مہکاتی ہیں

ایک بیٹی ہو تو کھل اُٹھتا ہے گھر کا آنگن 

گھر وہی ہوتا ہے پر رونقیں بڑھ جاتی ہیں

فاطمہ زہرا کی تعظیم کو اُٹھتے تھے رسول

محترم بٹیاں اس واسطے کہلاتی ہیں

اپنے بابا کے کلیجے سے لپٹ کر منظر

زندگی جینے کا احساس دلا جاتی ہیں

Read More

رحمان فارس

اِدھر اُدھر کہیں کوئی نشاں تو ھوگا ھی

یہ رازِ بوسۂ لب ھے، عیاں تو ھوگا ھی !!

تمام شہر جو دھندلا گیا تو حیرت کیوں ؟؟؟

دِلوں میں آگ لگی ھے ، دھواں تو ھوگا ھی

بروزِ حشر مِلے گا ضرور صبر کا پھل

یہاں تُو ھو نہ ھو میرا ، وھاں تو ھوگا ھی

یہ بات نفع پرستوں کو کون سمجھائے ؟؟

کہ کاروبارِ جنُوں میں زیاں تو ھو گا ھی

ھم اس اُمید پہ نکلے ھیں جھیل کی جانب

کہ چاند ھو نہ ھو ، آبِ رواں تو ھوگا ھی

مَیں کُڑھتا رھتا ھوں یہ سوچ کر کہ تیرے پاس

فُلاں بھی بیٹھا ھو شاید ، فُلاں تو ھوگا ھی !

یہ بات مدرسۂ دل میں کھینچ لائی مجھے

کہ درس ھو کہ نہ ھو ، امتحاں تو ھو گا ھی

مگر وہ پھول کے مانند ھلکی پُھلکی ھے !!!

سو اُس پہ عشق کا پتھر گراں تو ھو گا ھی

غزل کے روپ میں چمکے کہ آنکھ سے چھلکے

یہ اندرونے کا دکھ ھے ، بیاں تو ھوگا ھی

بڑی اُمیدیں لگا بیٹھے تھے سو اب فارس !

ملالِ بے رخئ دوستاں تو ھو گا ھی

Read More

کیفیؔ اعظمی

تُم اِتنا جو مُسکرا رہے ہو

کيا غم ہے جِس کو چُھپا رہے ہو

آنکھوں ميں نمی، ہنسی لبوں پر

کيا حال ہے، کيا دِکھا رہے ہو

بن جائيں گے زہر پيتے پيتے

يہ اشک جو پيتے جا رہے ہو

جِن زخموں کو وقت بھر چلا ہے

تم کيوں انہیں چھيڑے جا رہے ہو

ريکھاؤں کا کھيل ہے مقدّر

ريکھاؤں سے مات کھا رہے ہو

Read More

انور جاوید ہاشمی

غروروتمکنت وشوق میں، جو تن کے گئے

دریدہ رُوح ہوئی، اور لباس تن کے گئے

عجیب طور سے ہم مبتلائے عشق ہوئے

گلی میں یار کی، ا کثر فقیر بن کے گئے

نہ مانی دل نےکوئی بات، لاکھ سمجھایا

کہ وہ زمانے میاں قیس وکوہکن کے گئے

رہے کہاں، وہ پرانے عزیز دوست سبھی

جو ہمکلام ہمارے تھے انجمن کے، گئے

بجزمذاق، کوئی ماحصل نہ دیکھو گے

قرینے ہاتھ سے گر، ہاشمی سخن کے گئے

Read More

اکبرالٰہ آبادی

اے بُتو بہرِخُدا درپئے آزار نہ ہو

خیرراحت نہ سہی، زیست تو دشوار نہ ہ

یا رب ایسا کوئی بت خانہ عطا کر جس میں

ایسی گزرے کہ تصوّر بھی گنہگار نہ ہو

مُعترِض ہو نہ مِری عُزلت و خاموشی پر

کیا کروں جبکہ کوئی محرمِ اسرار نہ ہو

کیا وہ مستی، کہ دَمِ چند میں تکلیف شُمار

مست وہ ہے کہ قیامت میں بھی ہشیار نہ ہو

جان فرقت میں نہ نکلے تومجھے کیوں ہوعزیز

دوست وہ کیا جو مُصیبت میں مددگار نہ ہو

ناز کہتا ہے کہ زیور سے ہو تزئینِ جمال

نازکی کہتی ہے سُرمہ بھی کہیں بار نہ ہو

دل وہ ہے جس کو ہو سودائے جمالِ معنی

آنکھ وہ ہے کہ جو صُورت کی خریدار نہ ہو

دلِ پُر داغ کو ارماں، کہ گلے اُن کے لگے

اُن کو یہ ڈر، کہ گلے کا یہ کہِیں ہار نہ ہو

عاشقِ چشم سیہ مست تو زنہار نہ ہو

دیکھ اُس جان کی گاہک کا خریدار نہ ہو

ہرغُبارِ رہِ اُلفت ہے مِرا سُرمۂ چشم

دل یہ کہتا ہے کہ یہ خاکِ درِ یار نہ ہو

لن ترانی کی خبر عشق نے سُن رکھّی ہے

پھربھی مشکل ہے کہ وہ طالبِ دیدار نہ ہو

تم کوسودائے ستم کیوں ہے جو ہے شوقِ فُروغ

کیا تلَطُّف سببِ گرمئیِ بازار نہ ہو

قیمتِ دل تو گھٹانے کا نہیں میں اکبر

بے بصیرت نہیں ہوتا جوخریدار نہ ہو

Read More

پیر نصیرالدین شاہ نصیر

کبھی اُن کا نام لینا کبھی اُن کی بات کرنا

مِرا ذوق اُن کی چاہت مِرا شوق اُن پہ مرنا

وہ کسی کی جھیل آنکھیں وہ مِری جُنوں مِزاجی

کبھی ڈُوبنا اُبھر کر کبھی ڈُوب کر اُبھرنا

تِرے منچلوں کا جگ میں یہ عجب چلن رہا ہے

نہ کِسی کی بات سُننا نہ کِسی سے بات کرنا

شبِ غم نہ پُوچھ کیسے تِرے مُبتلا پہ گُزری

کبھی آہ بھر کے گِرنا کبھی گِر کے آہ بھرنا

وہ تِری گلی کے تیور، وہ نظر نظر پہ پہرے

وہ مِرا کِسی بہانے تُجھے دیکھتے گُزرنا

کہاں میرے دِل کی حسرت، کہاں میری نارسائی

کہاں تیرے گیسوؤں کا تِرے دوش پر بِکھرنا

چلے لاکھ چال دُنیا ہو زمانہ لاکھ دُشمن

جو تِری پناہ میں ہو اُسے کیا کِسی سے ڈرنا

وہ کریں گے ناخُدائی تو لگے گی پار کشتی

ہے نصیر ورنہ مُشکل تِرا پار یوں اُترنا

Read More

مفتی تقی عثمانی

محبت کیا ہے دل کا درد سے معمورہوجانا

متاعِ جاں کسی کو سونپ کر مجبور ہوجانا

قدم حیراں ہیں اُلفت میں تو منزل کی ہوس کیسی

یہاں تو عین منزل ہے تھکن سے چُور ہوجانا

یہاں تو سر سے پہلے دل کا سودا شرط ہے یاروں

کوئی آسان ہے کیا سرمد و منصور ہوجانا

بَسا لینا کسی کو دل میں دل ہی کا کلیجا ہے

پہاڑوں کو توبس آتا ہے جل کر طور ہوجانا

نظر سے دور رہ کر بھی تقی وہ پاس ہیں میرے

کے میری عاشقی کو عیب ہے مہجور ہوجانا.....

Read More

پروازؔ جالندھری

جن کے ہونٹوں پہ ہنسی پاؤں میں چھالے ہوں گے

ہاں وہی لوگ تمہیں ڈھونڈنے والے ہوں گے

مے برستی ہے، فضاؤں پہ نشہ طاری ہے

میرے ساقی نے کہیں جام اچھالے ہوں گے

شمع وہ لائے ہیں ہم جلوہ گہِ جاناں سے

اب دو عالم میں اجالے ہی اجالے ہوں گے

جن کے دل پاتے ہیں آسائشِ ساحل سے سکوں

اِک نہ اک روز طلاطم کے حوالے ہوں گے

ہم بڑے ناز سے آئے تھے تیری محفل میں

کیا خبر تھی لبِ اظہار پہ تالے ہوں گے

اُن سے مفہومِ غمِ زیست ادا ہو شاید

اشک جو دامنِ مژگاں نے سنبھالے ہوں گے

پروازؔ جالندھری

Read More

راحت اندوری

اگر خلاف ہیں، ہونے دو، جان تھوڑی ہے

یہ سب دھواں ہے، کوئی آسمان تھوڑی ہے

لگے گی آگ تو آئیں گے گھر کئی زد میں

یہاں پہ صرف ہمارا مکان تھوڑی ہے

میں جانتا ہوں کہ دشمن بھی کم نہیں لیکن

ہماری طرح ہتھیلی پہ جان تھوڑی ہے

ہمارے منہ سے جو نکلے وہی صداقت ہے

ہمارے منہ میں تمہاری زبان تھوڑی ہے

جو آج صاحبِ مسند ہیں، کل نہیں ہوں گے

کرائے دار ہیں، ذاتی مکان تھوڑی ہے

سبھی کا خون ہے شامل یہاں کی مٹی میں

کسی کے باپ کا ہندوستان تھوڑی ہے

Read More

مظفر وارثی

کوئی تو ہے جو نظامِ ہستی چلا رہا ہے ، وہی خدا ہے

دکھائی بھی جو نہ دے ، نظر بھی جو آرہا ہے وہی خدا ہے

تلاش اُس کو نہ کر بتوں میں ، وہ ہے بدلتی ہوئی رُتوں میں

جو دن کو رات اور رات کو دن بنا رہا ہے ، وہی خدا ہے

وہی ہے مشرق وہی ہے مغرب ، سفر کریں سب اُسی کی جانب

ہر آئینے میں جو عکس اپنا دکھا رہا ہے ، وہی خدا ہے

کسی کو سوچوں نے کب سراہا ، وہی ہوا جو خدا نے چاہا

جو اختیارِ بشر پہ پہرے بٹھا رہا ہے ، وہی خدا ہے

نظر بھی رکھے ،سماعتیں بھی ، وہ جان لیتا ہے نیتیں بھی

جو خانہء لاشعور میں جگمگا رہا ہے ، وہی خدا ہے

کسی کو تاجِ وقار بخشے ، کسی کو ذلت کے غار بخشے

جو سب کے ماتھے پہ مہرِ قدرت لگا رہا ہے ، وہی خدا ہے

سفید اُس کا سیاہ اُس کا ، نفس نفس ہے گواہ اُس کا

جو شعلہء جاں جلا رہا ہے ، بُجھا رہا ہے ، وہی خدا ہے

Read More

وصی شاہ

ﺍﺑﮭﯽ ﺗﻮ ﻋﺸﻖ ﻣﯿﮟ ﺍﯾﺴﺎ ﺑﮭﯽ ﺣﺎﻝ ﮨﻮﻧﺎ ﮨﮯ

ﮐﮧ ﺍَﺷﮏ ﺭﻭﮐﻨﺎ ﺗﻢ ﺳﮯ ﻣﺤﺎﻝ ﮨﻮﻧﺎ ﮨﮯ

ﮨﺮ ﺍﯾﮏ ﻟﺐ ﭘﮧ ﮨﯿﮟ ﻣﯿﺮﯼ ﻭﻓﺎ ﮐﮯ ﺍﻓﺴﺎﻧﮯ

ﺗﺮﮮ ﺳﺘﻢ ﮐﻮ ﺍﺑﮭﯽ ﻻﺯﻭﺍﻝ ﮨﻮﻧﺎ ﮨﮯ

ﺑﺠﺎ ﮐﮯ ﺧﺎﺭ ﮨﯿﮟ ﻟﯿﮑﻦ ﺑﮩﺎﺭ ﮐﯽ ﺭُﺕ ﻣﯿﮟ

ﯾﮧ ﻃﮯ ﮨﮯ ﺍَﺏ ﮐﮯ ﮨﻤﯿﮟ ﺑﮭﯽ ﻧﮩﺎﻝ ﮨﻮﻧﺎ ﮨﮯ

ﺗﻤﮩﯿﮟ ﺧﺒﺮ ﮨﯽ ﻧﮩﯿﮟ ﺗﻢ ﺗﻮ ﻟﻮﭦ ﺟﺎﺋﻮ ﮔﮯ

ﺗﻤﮩﺎﺭﮮ ﮨﺠﺮ ﻣﯿﮟ ﻟﻤﺤﮧ ﺑﮭﯽ ﺳﺎﻝ ﮨﻮﻧﺎ ﮨﮯ

ﮨﻤﺎﺭﯼ ﺭُﻭﺡ ﭘﮧ ﺟﺐ ﺑﮭﯽ ﻋﺬﺍﺏ ﺍُﺗﺮﯾﮟ ﮔﮯ

ﺗﻤﮩﺎﺭﯼ ﯾﺎﺩ ﮐﻮ ﺍِﺱ ﺩِﻝ ﮐﯽ ﮈﮬﺎﻝ ﮨﻮﻧﺎ ﮨﮯ

ﮐﺒﮭﯽ ﺗﻮ ﺭﻭﺋﮯ ﮔﺎ ﻭﮦ ﺑﮭﯽ ﮐﺴﯽ ﮐﯽ ﺑﺎﻧﮩﻮﮞ ﻣﯿﮟ

ﮐﺒﮭﯽ ﺗﻮ ﺍُﺱ ﮐﯽ ﮨﻨﺴﯽ ﮐﻮ ﺯﻭﺍﻝ ﮨﻮﻧﺎ ﮨﮯ

ﻣﻠﯿﮟ ﮔﯽ ﮨﻢ ﮐﻮ ﺑﮭﯽ ﺍﭘﻨﮯ ﻧﺼﯿﺐ ﮐﯽ ﺧﻮﺷﯿﺎﮞ

ﺑﺲ ﺍِﻧﺘﻈﺎﺭ ﮨﮯ ﮐﺐ ﯾﮧ ﮐﻤﺎﻝ ﮨﻮﻧﺎ ﮨﮯ

ﮨﺮ ﺍﯾﮏ ﺷﺨﺺ ﭼﻠﮯ ﮔﺎ ﮨﻤﺎﺭﯼ ﺭﺍﮨﻮﮞ ﭘﺮ

ﻣﺤﺒﺘﻮﮞ ﻣﯿﮟ ﮨﻤﯿﮟ ﻭﮦ ﻣﺜﺎﻝ ﮨﻮﻧﺎ ﮨﮯ

ﺯﻣﺎﻧﮧ ﺟﺲ ﮐﮯ ﺧﻢ ﻭ ﭘﯿﭻ ﻣﯿﮟ ﺍُﻟﺠﮫ ﺟﺎﺋﮯ

ﮨﻤﺎﺭﯼ ﺫﺍﺕ ﮐﻮ ﺍﯾﺴﺎ ﺳﻮﺍﻝ ﮨﻮﻧﺎ ﮨﮯ

ﻭﺻﯽؔ ﯾﻘﯿﻦ ﮨﮯ ﻣُﺠﮫ ﮐﻮ ﻭﮦ ﻟﻮﭦ ﺁﺋﮯ ﮔﺎ

ﺍُﺳﮯ ﺑﮭﯽ ﺍﭘﻨﮯ ﮐﯿﮯ ﮐﺎ ﻣﻼﻝ ﮨﻮﻧﺎ ﮨﮯ

Read More

افتخار عارف

سمجھ رہے ہیں اور بولنے کا یارا نہیں

جو ہم سے مل کے بچھڑ جائے وہ ہمارا نہیں

ابھی سے برف اُلجھنے لگی ہے بالوں سے

ابھی تو قرضِ ماہ و سال بھی اُتارا نہیں

سمندروں کو بھی حیرت ہوئی کہ ڈوبتے وقت

کسی کو ہم نے مدد کیلئے پکارا نہیں

جو ہم نہیں تھے تو پھر کون تھا سرِ بازار

جو کہہ رہا تھا کہ بکنا ہمیں گوارا نہیں

ہم اہلِ دل ہیں محبت کی نسبتوں کے امیں

ہمارے پاس زمینوں کا گوشوارہ نہیں

افتخار عارف

آسمانوں پر نظر کر انجم و مہتاب دیکھ

صبح کی بنیاد رکھنی ہے تو پہلے خواب دیکھ

ہم بھی سوچیں گے دعائے بے اثر کے باب میں

اِک نظر تو بھی تضادِ منبر و محراب دیکھ

دوش پر ترکش پڑا رہنے دے، پہلے دل سنبھال

دل سنبھل جائے تو سوئے سینہٴ احباب دیکھ

موجہٴ سرکش کناروں سے چھلک جائے تو پھر

کیسی کیسی بستیاں آتی ہیں زیرِ آب دیکھ

بوند میں سارا سمندر آنکھ میں کل کائنات

ایک مشتِ خاک میں سورج کی آب وتاب دیکھ

افتحار عارف

Read More