اور سب بھول گئے حرفِ صداقت لکھنا

اور سب بھول گئے حرفِ صداقت لکھنا

رو گیا کام ہمارا ہی بغاوت لکھنا

لاکھ کہتے رہیں ظلمت کو نہ ظلمت لکھنا

ہم نے سیکھا نہیں پیارے بہ اجازت لکھنا

نہ صلے کی نہ ستائش کی تمنّا ہم کو

حق میں لوگوں کے ہماری تو ہے عادت لکھنا

ہم نے جو بھول کے بھی شہ کا قصیدہ نہ لکھا

شاید آیا اسی خوبی کی بدولت لکھنا

اس سے بڑھ کر مری تحسین بھلا کیا ہوگی

پڑھ کے ناخوش ہیں مرا صاحبِ ثروت لکھنا

دہر کے غم سے ہوا ربط تو ہم بھول گئے

سرو قامت کو جوانی کو قیامت لکھنا

کچھ بھی کہتے ہیں کہیں شہ کے مصاحب جالب

رنگ رکھنا یہی اپنا اسی صورت لکھنا

حبیب جالب

Read More

انور مسعود

دُنیا بھی عجب قافلہِ تشنہ لباں ہے

ہر شخص سرابوں کے تعاقب میں رواں ہے

تنہا تری محفل میں نہیں ہوں کہ مرے ساتھ

اِک لذتِ پابندیِ اظہار و بیاں ہے

جو دل کے سمندر میں اُبھرتا ہے یقیں ہے

جو ذہن کے ساحل سے گزرتا ہے گُماں ہے

پُھولوں پہ گھٹاؤں کے تو سائے نہیں انور

آوارۂ گلزار نشیمن کا دُھواں ہے




بر سبیلِ تذکرہ اِک روز میڈم نے کہا
اپنے شوخ و شنگ اندازِ تکلم کے بغیر
میرا وعدہ ہے کہ گانا چھوڑ دوں گی میں اگر
مولوی تقریر فرمائے ترنم کے بغیر
____________________________

جو ہے اوروں کی وہی رائے ہماری بھی ہے
ایک ہو رائے سبھی کی، یہ کچھ آسان نہیں
لوگ کہتے ہیں فرشتہ ہیں جنابِ واعظ
ہم بھی کہتے تو یہی ہیں کہ وہ انسان نہیں

Read More