ویراں ہے میکدہ، خم و ساغراداس ہیں

ویراں ہے میکدہ، خم و ساغراداس ہیں

تم کیا گئے کہ روٹھ گئے دن بہار کے

دنیا نے تیری یاد سے بیگانہ کر دیا

تجھ سے بھی دلفریب ہیں غم روزگار کے

فیض احمد فیض

Read More

ترس رہا ہوں مگر تو نظر نہ آ مجھ کو

ترس رہا ہوں مگر تو نظر نہ آ مجھ کو
کہ خود جدا ہے تو مجھ سے نہ کر جدا مجھ کو 

وہ کپکپاتے ہوئے ہونٹ میرے شانے پر
وہ خواب سانپ کی مانند ڈس گیا مجھ کو

چٹخ اٹھا ہو سلگتی چٹان کی صورت
پکار اب تو مرے دیر آشنا مجھ کو

تجھے تراش کے میں سخت منفعل ہوں کہ لوگ
تجھے صنم تو سمجھنے لگے خدا مجھ کو

یہ اور بات کہ اکثر دمک اٹھا چہرہ
کبھی کبھی یہی شعلہ بجھا گیا مجھ کو

یہ قربتیں ہی تو وجہ فراق ٹھہری ہیں
بہت عزیز ہیں یاران بے وفا مجھ کو

ستم تو یہ ہے کہ ظالم سخن شناس نہیں
وہ ایک شخص کہ شاعر بنا گیا مجھ کو

اسے فرازؔ اگر دکھ نہ تھا بچھڑنے کا
تو کیوں وہ دور تلک دیکھتا رہا مجھ کو

احمد فراز

Read More

محبت کیا ہے دل کا درد سے معمور ہو جانا

محبت کیا ہے دل کا درد سے معمور ہو جانا

متاعِ جاں کسی کو سونپ کر مجبور ہو جانا

قدم ہیں راہِ الفت میں‌ تو منزل کی ہوس کیسی؟

یہاں تو عین منزل ہے تھکن سے چُور ہو جانا

یہاں تو سر سے پہلے دل کا سودا شرط ہے یارو

کوئی آسان ہے کیا سرمد و منصور ہوجانا

بَسا لینا کسی کو دل میں دل ہی کا کلیجا ہے

پہاڑوں کو توبس آتا ہے جل کر طور ہوجانا

نظر سے دور رہ کر بھی تقی وہ پاس ہیں میرے

کہ میری عاشقی کو عیب ہے مہجور ہوجانا

مفتی تقی عثمانی

Read More

نقاب روئے نادیدہ کا از خود دور ہو جانا

ہزاروں قربتوں پر یوں مرا مہجور ہو جانا 

جہاں سے چاہنا ان کا وہیں سے دور ہو جانا 

نقاب روئے نادیدہ کا از خود دور ہو جانا 

مبارک اپنے ہاتھوں حسن کو مجبور ہو جانا 

سراپا دید ہو کر غرق موج نور ہو جانا 

ترا ملنا ہے خود ہستی سے اپنی دور ہو جانا 

نہ دکھلائے خدا ، اے دیدہ تر دل کی بربادی 

جب ایسا وقت آئے پہلے تو بے نور ہو جانا 

جو کل تک لغزش پائے طلب مسکراتے تھے 

وہ دیکھیں آج ہر نقش قدم کا طور ہو جانا 

محبت کیا ہے ، تاثیر محبت کس کو کہتے ہیں؟ 

ترا مجبور کر دینا،مرا مجبور ہو جانا 

محبت عین مجبوری سہی لیکن یہ کیا باعث 

مجھے باور نہیں آتا مرا مجبور ہو جانا 

نگاہ ناز کو تکلیف جنبش تا کجا آخر 

مجھی پر منحصر کر دو مرا مجبور ہو جانا 

جگر وہ حسن یکسوئی کا منظر یاد ہے اب تک 

نگاہوں کا سمٹنا اور ہجوم نور ہو جانا 

جگر مراد آبادی

Read More

مِرا دیوانگی پر اس قدر مغرُور ہو جانا

مِرا دیوانگی پر اس قدر مغرُور ہو جانا

کہ رفتہ رفتہ حدِِّ آگہی سے دُور ہو جانا

پتہ دیتا ہے گُمراہیِ رہگیرِ محبت کا

بِچھڑنا اور بِچھڑ کر قافلے سے دُور ہو جانا

کہیں دنیائے اُلفت کو تہہ و بالا نہ کرڈالے

غرُورِ حُسن کے آئین کا دستُور ہو جانا

ازل سے تیرہ بخت عِشق کے حصے میں آیا ہے

شبِ غم دِل کا جل جل کر چراغِ طُور ہو جانا

مِری دانستِ ناقص میں کمالِ خود نُمائی ہے

زمیں سے آسماں تک آپ کا مشہُور ہو جانا

کسی کا جشنِ آزادی منانا ہے بہت آسان

مگر دُشوار ہے غارت گرِ جمہُور ہو جانا

رگوں کا خون رفتہ رفتہ ٹھنڈا ہو چلا میکشؔ

مِرے دردِ جِگر کو آگیا کافُور ہو جانا۔۔۔!

میکشؔ ناگپوری

Read More

ہم نے یہ عہد کیا ہے کہ محبت لکھنا

ہم نے یہ عہد کیا ہے کہ محبت لکھنا

زندگی بھر کسی انساں سے نہ نفرت لکھنا

ان کو چاہا تو عجب شان سے چاہا ہم نے

بس انہیں سوچا ہے تاعمر قیامت لکھنا

کچھ ہنر آ نہ سکا مدح سرائی کا ہمیں

اور آیا تو روایت سے بغاوت لکھنا

رہبرِ قوم ملے کیسے ہمیں واہ رے نصیب

,, اور سب بھول گئے حرفِ صداقت لکھنا,,

سر میں سودا لئے پھرتے رہے در در یارو!

الغرض سیکھ گئے نسخۂ وحشت لکھنا

ان دنوں شہر کے لوگوں کا چلن ایسا ہوا

چور ہیں جو بھی انہیں صاحبِ ثروت لکھنا

الاماں بیٹھے ہیں مسند پہ یہ کیسے حاکم

جن کی خصلت ہی نہیں لوگوں کی خدمت لکھنا

ہاتھ پر ہاتھ دھرے بیٹھے ہیں کب سے یارو!

کون پوری کرے حاجت کیا شکایت لکھنا

ان سے رکھا نہ گیا کچھ بھی محبت کا بھرم

خاک اب خط میں انہیں جانِ محبت لکھنا

ہاتھ میں رکھا ہے بس ہم نے قلم کا ہتھیار

پاس اپنے ہے یہی حرف کی طاقت لکھنا

زندگی بھر ہمیں شہزاد کہاں چین ملا

کاش آجاتا ہمیں غم کو بھی راحت لکھنا

ضیاء شہزاد

Read More

اور سب بھول گئے حرفِ صداقت لکھنا

اور سب بھول گئے حرفِ صداقت لکھنا

رو گیا کام ہمارا ہی بغاوت لکھنا

لاکھ کہتے رہیں ظلمت کو نہ ظلمت لکھنا

ہم نے سیکھا نہیں پیارے بہ اجازت لکھنا

نہ صلے کی نہ ستائش کی تمنّا ہم کو

حق میں لوگوں کے ہماری تو ہے عادت لکھنا

ہم نے جو بھول کے بھی شہ کا قصیدہ نہ لکھا

شاید آیا اسی خوبی کی بدولت لکھنا

اس سے بڑھ کر مری تحسین بھلا کیا ہوگی

پڑھ کے ناخوش ہیں مرا صاحبِ ثروت لکھنا

دہر کے غم سے ہوا ربط تو ہم بھول گئے

سرو قامت کو جوانی کو قیامت لکھنا

کچھ بھی کہتے ہیں کہیں شہ کے مصاحب جالب

رنگ رکھنا یہی اپنا اسی صورت لکھنا

حبیب جالب

Read More

سامنے اس کے کبھی اس کی ستائش نہیں کی

سامنے اس کے کبھی اس کی ستائش نہیں کی

دل نے چاہا بھی اگر، ہونٹوں نے جنبش نہیں کی

اہلِ محفل پہ کب احوال کھلا ہے اپنا

ہم بھی خاموش رہے اس نے بھی پُرسش نہیں کی

جس قدر اس سے تعلق تھا چلا جاتا ہے

اس کا کیا رنج کہ جس کی کبھی خواہش نہیں کی

یہ بھی کیا کم ہے کہ دونوں کا بھرم قائم ہے

اس نے بخشش نہیں کی ہم نے گزارش نہیں کی

اک تو ہم کو ادب آداب نے پیاسا رکھا

اس پہ محفل میں صراحی نے بھی گردش نہیں کی

ہم کہ دکھ اوڑھ کے خلوت میں پڑے رہتے ہیں

ہم نے بازار میں زخموں کی نمائش نہیں کی

اے مرے ابرِ کرم دیکھ یہ ویرانۂ جاں

کیا کسی دشت پہ تو نے کبھی بارش نہیں کی

کٹ مرے اپنے قبیلے کی حفاظت کے لیے

مقتلِ شہر میں ٹھہرے رہے جنبش نہیں کی

وہ ہمیں بھول گیا ہو تو عجب کیا ہے فرازؔ

ہم نے بھی میل ملاقات کی کوشش نہیں کی

احمد فرازؔ

Read More

جب بھی لکھنا ہو تمہیں صرف حقیقت لکھنا

احمد علی برقی اعظمی

جب بھی لکھنا ہو تمہیں صرف حقیقت لکھنا

تم ریاکاری کو ہرگز نہ عبادت لکھنا

اے مورخ رہے ملحوظ قلم کی حُرمت

میرے حالات کو افسانۂ عبرت لکھنا

جس سے وہ صفحۂ تاریخ کی زینت بن جائے

ہو بہو جیسی ہو جس کی وہی صورت لکھنا

ناگہاں موت قیامت سے نہیں کم ہوتی

تم فسادات کو آثارِ قیامت لکھنا

آج ہیں نذرِ فسادات جہاں بھی مظلوم

تم اسے اہلِ حکومت کی شرارت لکھنا

امن کے نام پہ جو جنگ کو دیتے ہیں ہوا

اُن کے اطوار کو شیطان کی خصلت لکھنا

جیسے پہلے تھے نہ ویسے رہے برقی اخبار

آج سب بھول گئے حرفِ صداقت لکھنا

Read More

ہم نے یہ عہد کیا ہے کہ محبت لکھنا

ہم نے یہ عہد کیا ہے کہ محبت لکھنا

زندگی بھر کسی انساں سے نہ نفرت لکھنا

ان کو چاہا تو عجب شان سے چاہا ہم نے

بس انہیں سوچا ہے تاعمر قیامت لکھنا

کچھ ہنر آ نہ سکا مدح سرائی کا ہمیں

اور آیا تو روایت سے بغاوت لکھنا

رہبرِ قوم ملے کیسے ہمیں واہ رے نصیب

,, اور سب بھول گئے حرفِ صداقت لکھنا,,

سر میں سودا لئے پھرتے رہے در در یارو!

الغرض سیکھ گئے نسخۂ وحشت لکھنا

ان دنوں شہر کے لوگوں کا چلن ایسا ہوا

چور ہیں جو بھی انہیں صاحبِ ثروت لکھنا

الاماں بیٹھے ہیں مسند پہ یہ کیسے حاکم

جن کی خصلت ہی نہیں لوگوں کی خدمت لکھنا

ہاتھ پر ہاتھ دھرے بیٹھے ہیں کب سے یارو!

کون پوری کرے حاجت کیا شکایت لکھنا

ان سے رکھا نہ گیا کچھ بھی محبت کا بھرم

خاک اب خط میں انہیں جانِ محبت لکھنا

ہاتھ میں رکھا ہے بس ہم نے قلم کا ہتھیار

پاس اپنے ہے یہی حرف کی طاقت لکھنا

زندگی بھر ہمیں شہزاد کہاں چین ملا

کاش آجاتا ہمیں غم کو بھی راحت لکھنا

 ضیاء شہزاد

Read More

اور سب بھول گئے حرفِ صداقت لکھنا

حبیب جالب

اور سب بھول گئے حرفِ صداقت لکھنا

رو گیا کام ہمارا ہی بغاوت لکھنا

لاکھ کہتے رہیں ظلمت کو نہ ظلمت لکھنا

ہم نے سیکھا نہیں پیارے بہ اجازت لکھنا

نہ صلے کی نہ ستائش کی تمنّا ہم کو

حق میں لوگوں کے ہماری تو ہے عادت لکھنا

ہم نے جو بھول کے بھی شہ کا قصیدہ نہ لکھا

شاید آیا اسی خوبی کی بدولت لکھنا

اس سے بڑھ کر مری تحسین بھلا کیا ہوگی

پڑھ کے ناخوش ہیں مرا صاحبِ ثروت لکھنا

دہر کے غم سے ہوا ربط تو ہم بھول گئے

سرو قامت کو جوانی کو قیامت لکھنا

کچھ بھی کہتے ہیں کہیں شہ کے مصاحب جالب

رنگ رکھنا یہی اپنا اسی صورت لکھنا

Read More

شیشہ مرے لا شعور کا ہے

سلیمان خمار

شیشہ مرے لا شعور کا ہے

جس میں ترا عکس جم گیا ہے

یوں ہے کہ معاملہ ہمارا

ہاتھوں کی لکیر سے ورا ہے

تھکتے نہیں اس لئے مرے پانؤ

تُو بھی مرے ساتھ چل رہا ہے

جلتا ہے نہ جانے کیوں زمانہ

جب تُو مجھے ہنس کے دیکھتا ہے

ٹوٹی مری نیند تو کھُلا یہ

میرے لئے کوئی جاگتا ہے

پھر آگئی دل میں یاد اُس کی

صحرا میں گلاب کھِل رہا ہے

تنہائیاں گُنگُنا رہی ہیں

یادوں کا ستار بج رہا ہے

لمحوں کی تِھرکتی تتلیوں پر

میں نے ترا نام لکھ دیا ہے

جادو ہیں تری سمندر آنکھیں

دریا کا بہاؤ رُک گیا ہے

Read More

احمد ندیم قاسمی

احمد ندیم قاسمی

ہر لمحہ اگر گریز پا ہے

تُو کیوں مرے دل میں بس گیا ہے

چلمن میں گلاب کھِل رہا ہے

یہ تُو ہے کہ شوخیء صبا ہے

میں نے تجھے دیکھا جب سے پیارے

ہر چیز پہ، پیار آ رہا ہے

میری تیرے کہے سے چپ ہوں لیکن

چپ بھی تو بیانِ مدعا ہے

ہر دیس کی اپنی اپنی بولی

صحرا کا سکوت بھی صدا ہے

اک عمر کے بعد مسکرا کر

تُو نے تو مجھے رُلا دیا ہے

اُس وقت کا میں حساب کیا دوں

جو تیرے بغیر کٹ گیا ہے

رونے کو اب اشک بھی نہیں ہیں

یا عشق کو صبر آ گیا ہے

اب کس کی تلاش میں ہیں جھونکے

میں نے تو دیا بُجھا دیا ہے

کچھ کھیل نہیں ہے عشق کرنا

یہ زندگی بھر کا رت جگا ہے

Read More

ایک زمین کئی شاعر

محشر بدایونی اور احمد علی برقی اعظمی

محشر بدایونی

آخر آخر ایک غم ہی آشنا رہ جائے گا 

اور وہ غم بھی مجھ کو اک دن دیکھتا رہ جائے گا 

سوچتا ہوں اشک حسرت ہی کروں نذر بہار 

پھر خیال آتا ہے میرے پاس کیا رہ جائے گا 

اب ہوائیں ہی کریں گی روشنی کا فیصلہ 

جس دیے میں جان ہوگی وہ دیا رہ جائے گا 

آج اگر گھر میں یہی رنگ شب عشرت رہا 

لوگ سو جائیں گے دروازہ کھلا رہ جائے گا 

تا حد منزل توازن چاہئے رفتار میں 

جو مسافر تیز تر آگے بڑھا رہ جائے گا 

گھر کبھی اجڑا نہیں یہ گھر کا شجرہ ہے گواہ 

ہم گئے تو آ کے کوئی دوسرا رہ جائے گا 

روشنی محشرؔ رہے گی روشنی اپنی جگہ 

میں گزر جاؤں گا میرا نقش پا رہ جائے گا 

احمد علی برقیؔ اعظمی

نور حق کونین میں جلوہ نما رہ جائے گا

’’ جس دئے میں جان ہوگی وہ دیا رہ جائے گا ‘‘

حُسنِ عالمتاب ہے غارتگرِ ہوش و خرد

تو اگر دیکھے گا اس کو دیکھتارہ جائے گا

خاک میں مِل جائے کا یہ جاہ و حشمت کا نشاں

صفحۂ تاریخ پر تو بدنما رہ جائے گا

کام آئیں گے نہ تیرے حاشیہ بردار یہ

ساتھ تیرے ظلم و جورِ ناروا رہ جائے گا

یہ جہانِ رنگ و بو ہے عالمِ ناپایدار

سب فنا ہوجائے گا دارالبقا رہ جائے گا

ظلم و استحصال کی ہوتی ہے آخر ایک حد

ختم ہوجائے گا سب نامِ خدا رہ جائے گا

خدمتِ نوعِ بشر سے بڑھ کے برقی کچھ نہیں

زیبِ تاریخِ جہاں نامِ وفا رہ جائے گا

Read More

ایک زمین کئی شاعر

ایک زمین کئی شاعر

میرتقی میر اور احمد علی برقی اعظمی

میر تقی میرؔ

اس کا خیال چشم سے شب خواب لے گیا 

قسمے کہ عشق جی سے مرے تاب لے گیا 

کن نیندوں اب تو سوتی ہے اے چشم گریہ ناک 

مژگاں تو کھول شہر کو سیلاب لے گیا 

آوے جو مصطبہ میں تو سن لو کہ راہ سے 

واعظ کو ایک جام مئے ناب لے گیا 

نے دل رہا بجا ہے نہ صبر و حواس و ہوش 

آیا جو سیل عشق سب اسباب لے گیا 

میرے حضور شمع نے گریہ جو سر کیا 

رویا میں اس قدر کہ مجھے آب لے گیا 

احوال اس شکار زبوں کا ہے جائے رحم 

جس ناتواں کو مفت نہ قصاب لے گیا 

منہ کی جھلک سے یار کے بے ہوش ہو گئے 

شب ہم کو میرؔ پرتو مہتاب لے گیا

احمد علی برقی اعظمی

سرسبز کھیت گلشنِ شاداب لے گیا

سب کچھ بہا کے ساتھ میں گرداب لے گیا

برباد کر نہ دے تجھے تیرا خمارِ خواب

’’ مژگاں تو کھول شہر کو سیلاب لے گیا‘‘

مت پوچھ میرے کیسے گذرتے ہیں روز و شب

جو کچھ بچی تھی مُجھ میں تب و تاب لے گیا

گُل ہو نہ جائے شمعِ شبستانِ زندگی

جو روشنی تھی کِرمکِ شبتاب لے گیا

صبر آزما ہے میرے لئے اُس کا انتظار

آنکھوں سے وہ چُرا کے مری خواب لے گیا

آنکھوں کی میری پیاس بجھائے گا کون اب

چشمِ پُر آب سے وہ مری آب لے گیا

وہ اپنے ساتھ لے گیا اس کی متاعِ شوق

برقیؔ سے اس کا گوہرِ نایاب لے گیا

Read More

فیض احمد فیض

سچ ہے ہمیں کو آپ کے شکوے بجا نہ تھے
بے شک ستم جناب کے سب دوستانہ تھے

ہاں، جو جفا بھی آپ نے کی قاعدے سے کی!
ہاں، ہم ہی کاربندِ اُصولِ وفا نہ تھے

آئے تو یوں کہ جیسے ہمیشہ تھے مہرباں
بُھولے تو یوں کہ گویا کبھی آشنا نہ تھے  

کیوں دادِ غم ہمیں نے طلب کی، بُرا کیا
ہم سے جہاں میں کشتۂ غم اور کیا نہ تھے

گر فکرِ زخم کی تو خطاوار ہیں کہ ہم
کیوں محوِ مدح خوبیِ تیغِ ادا نہ تھے

ہر چارہ گر کو چارہ گری سے گریز تھا
ورنہ ہمیں جو دکھ تھے ، بہت لادوا نہ تھے

لب پر ہے تلخیِ مئے  ایّام، ورنہ فیض
ہم تلخیِ کلام پہ مائل ذرا نہ تھے

فیض احمد فیض 

Read More

رونے سے اور عِشق میں بیباک ہوگئے

رونے سے اور عِشق میں بیباک ہوگئے
دھوئے گئے ہم اتنے، کہ بس پاک ہوگئے

صرفِ بہائے مے ہُوئے آلاتِ میکشی !
تھے یہ ہی دو حساب سو یُو ں پاک ہوگئے

رُسوائے دہر گو ہُوئے آوار گی سے تم
بارے طبیعتوں کے تو چالاک ہوگئے

کہتا ہے کون نالۂ بُلبُل کو بے اثر
پردے میں گُل کے، لاکھ جگر چاک ہوگئے

پُوچھے ہے کیا وجُود و عدم اہلِ شوق کا
آپ اپنی آگ کے خس و خاشاک ہوگئے

کرنے گئے تھے اُس سے تغافل کا ہم گِلہ
کی ایک ہی نِگاہ کہ بس خاک ہوگئے

اِس رنگ سے اُٹھائی کل اُس نے اسد کی نعش
دُشمن بھی جس کو دیکھ کے غمناک ہوگئے
مرزا اسداللہ خاں غالب 

Read More

ہم میں ہی تھی نہ کوئی بات، یاد نہ تُم کو آ سکے

ہم میں ہی تھی نہ کوئی بات، یاد نہ تُم کو آ سکے

تُم نے ہمیں بُھلا دیا، ہم نہ تمہیں بُھلا سکے

تُم ہی اگر نہ سُن سکے، قِصّۂ غم سُنے گا کون 

کس کی زباں کُھلے گی پھر، ہم نہ اگر سُنا سکے

ہوش میں آ چکے تھے ہم، جوش میں آ چکے تھے ہم

بزْم کا رنگ دیکھ کر سَر نہ مگر اُٹھا سکے

رونقِ بزْم بن گئے، لب پہ حکایتیں رہیں

دل میں شکایتیں رہیں لب نہ مگر ہِلا سکے

شوقِ وصال ہے یہاں، لب پہ سوال ہے یہاں

کِس کی مجال ہے یہاں ہم سے نظر مِلا سکے

ایسا ہو کوئی نامہ بر، بات پہ کان دھر سکے

سُن کے یقین کرسکے، جا کے اُنھیں سُنا سکے

عجْز سے اور بڑھ گئی  برہمیِ مزاجِ دوست

اب وہ کرے علاجِ دوست، جس کی سمجھ میں آ سکے

اہلِ زباں تو ہیں بہت، کوئی نہیں ہے اہلِ دل

کون تِری طرح حفیظ ، درد کے گیت گا سکے

حفیظ جالندھری

Read More

ممکن ہو آپ سے تو بھلا دیجئے مجھے

ممکن ہو آپ سے تو بھلا دیجئے مجھے
پتھر پہ ہوں لکیر مٹا دیجئے مجھے

ہر روز مجھ سے تازہ شکایت ہے آپ کو
میں کیا ہوں، ایک بار بتا دیجئے مجھے

میرے سوا بھی ہے کوئی موضوعِ گفتگو
اپنا بھی کوئی رنگ دکھا دیجئے مجھے

میں کیا ہوں کس جگہ ہوں مجھے کچھ خبر نہیں
ہیں آپ کتنی دور صدا دیجئے مجھے

کی میں نے اپنے زخم کی تشہیر جا بجا
میں مانتا ہوں جرم سزا دیجئے مجھے

قائم تو ہو سکے کوئی رشتہ گہر کے ساتھ
گہرے سمندروں میں بہا دیجئے مجھے

شب بھر کرن کرن کو ترسنے سے فائدہ
ہے تیرگی تو آگ لگا دیجئے مجھے

جلتے دنوں میں خود پسِ دیوار بیٹھ کر
سائے کی جستجو میں لگا دیجئے مجھے

شہزادؔ یوں تو شعلۂ جاں سرد ہو چکا
لیکن سُلگ اٹھیں تو ہوا دیجئے مجھے

شہزاد احمد

Read More

میر وزیر علی صبا لکھنوی

جلوہ ہے ہر اک رنگ میں اے یار تمہارا

اک نور ہے کیا مختلف آثار تمہارا

ہوتا نہ یہ بندہ جو خریدار تمہارا

رونق نہ پکڑتا کبھی بازار تمہارا

اے منعمو! سامانِ سواری پہ نہ بھولو

اڑ جائے گا اک روز ہوادار تمہارا

تم قتل کرو گے جو مجھے تیغِ نگہ سے

منہ دیکھ کے رہ جائے گی تلوار تمہارا

بوسے لبِ شیریں کے عنایت نہیں ہوتے

پرہیز میں مر جائے گا بیمار تمہارا

گہ آئینہ ہوا، گہ دیدہء پُر آب گھٹا
کبھی بڑھا کبھی دریائے اضطراب گھٹا

عزیز آئے نہ رونے کو میری تربت پر
بہا کے اشک ہوئی داخلِ ثواب گھٹا

تمہاری زلف نہ گردابِ ناف تک پہنچی
ہوئی نہ چشمہء حیواں سے فیض یاب گھٹا

فراقِ یار میں بے کار سب ہیں اے ساقی
پیالہ، شیشہ، گزک، میکدہ، شراب، گھٹا

کسی کو منہ تہہِ زلفِ سیاہ یاد آیا
کبھی جو آ گئ بالائے آفتاب گھٹا 

تری کمر کی لچک پر تڑپتی ہے بجلی
ہوائے زلف میں کھاتی ہے پیچ و تاب گھٹا

ہوائے یار میں کیا دل کو اضطراب رہا
چکور چاند کی خاطر بہت خراب رہا

ہمیشہ کوششِ دنیا میں اضطراب رہا
بہت خراب دلِ خانماں خراب رہا

نہ برشگال میں جب تک شراب پلوا لی
بلا کی طرح سے سر پر مرے سحاب رہا

ہم اپنے حال پہ روتے ہیں اب ضعیفی میں
خوشا وہ عہد کہ طفلی رہی، شباب رہا

وہ بادہ نوش تھے پیری میں بھی نہ توبہ کی
شراب خُم میں رہی، شیشی میں خضاب رہا

ہر اک مقام پہ نشوونما رہی دل کی
چمن میں پھول رہا، بحر میں حباب رہا

خط آ گیا ، نہ رہا عشقِ مصحفِ رخِ یار
نہ وہ کتاب رہی اور نہ وہ حساب رہا

ہمیشہ قلزمِ ہستی میں صورتیں بدلیں
کبھی تو موج رہا اور کبھی حباب رہا

یہ وہ فلک ہے کہ جس کے سبب سے عالم میں
نہ ایک حال پہ دو روز ماہتاب رہا

خوشی وہ کون سی دی جس کے بعد غم نہ دیا
ہمیشہ سر پہ فلک بر سرِ حساب رہا

کمند لے کے وہیں موج ہو گئ موجود
جہاں ذرا سر اٹھائے ہوئے حباب رہا

برنگِ موجِ ہوا اے صبا ہوئے تھے خلق
رہے جہان میں جس دم تک اضطراب رہا

کیوں ان کی چال دیکھی جو یہ حال ہو گیا
میں آپ اہنے ہاتھ سے پامال ہو گیا

کچھ قیس سے بھی بڑھ کے مرا حال ہو گیا
کس قہر کا جنوں مجھے امسال ہو گیا

میں بدنصیب، غیر خوش اقبال ہو گیا
یہ آپ کے مزاج کا کیا حال ہو گیا

دریا بہا مرے عرقِ انفعال کا
کاغز کی ناؤ نامہء اعمال ہو گیا

ہم پِس گئے خرام پہ تو یار نے کہا
پاپوش سے اگر کوئی پامال ہو گیا

مجھ سے فضول خرچ کے ہتھے جو چڑھ گیا
دو دن میں آسمان بھی کنگال ہو گیا

نیا سوانگ لائے ہیں عشقِ صنم میں
ذرا کوئی دیکھے تماشا ہمارا

نکل جائے گی سب کجی آسماں کی
کبھی تو پھرے گا زمانا ہمارا

دلایا گیا فاتحہ جامِ مے پر
ہوا میکدے میں پیالا ہمارا

شبِ ہجر میں عرش تک ہل رہا ہے
بہت دور جاتا ہے نالا ہمارا

ترے ہاتھ سے واشدِ دل نہ ہو گی
کھلے گا نہ تجھ سے معما ہمارا

کدورت نہیں اپنی طبعِ رواں میں
بہت صاف بہتا ہے دریا ہمارا

واعظ کے، میں ضرور ڈرانے سے ڈر گیا
جامِ شراب لائے بھی، ساقی کدھر گیا

بلبل کہاں، بہار کہاں، باغباں کہاں
وہ دن گذر گئے، وہ زمانہ گذر گیا

جھوٹوں کا بادشاہ کہوں، اے صنم تجھے
یہ حال ہے کہ بات کہی اور مکر گیا

ایسی کفن کی قطع پسند آ گئ ہمیں
دل سے ہمارے جامہء ہستی اتر گیا

صورت ہمارے دیدہء حیراں کی دیکھ کر
آئینہ صاف ان کی نظر سے اتر گیا

اچھا ہوا جو ہو گئے وحدت پرست ہم
فتنہ گیا، فساد گیا، شور و شر گیا

کعبے کی سمت سجدہ کیا دل کو چھوڑ کر
تو کس طرف تھا، دھیان ہمارا کدھر گیا

مثلِ حباب بحرِ جہاں میں نہ دم لیا
اک موج تھا کہ میں اِدھر آیا، اُدھر گیا

پھر سیرِ لالہ زار کو ہم اے صبا چلے
آئی بہار، داغِ جنوں پھر ابھر گیا

Read More