شیخ امام بخش ناسخ

واعظا مسجد سے اب جاتے ہیں مے خانے کو ہم

پھینک کر ظرفِ وضو لیتے ہیں پیمانے کو ہم

کیا مگس بیٹھا بھلا اس شعلہ رو کے جسم پر

اپنے داغوں سے جلا دیتے ہیں پروانے کو ہم

تیرے آگے کہتے ہیں گل کھول کر بازوئے برگ

گلشنِ عالم سے ہیں تیار اڑ جانے کو ہم

کون کرتا ہے بتوں کے آگے سجدہ زاہدا

سر کو دے دے مار کر توڑیں گے بتخانے کو ہم

جب غزالوں کے نظر آ جاتے ہیں چشمِ سیاہ

دشت میں کرتے ہیں یاد اپنے سیہ خانے کو ہم

بوسہءِ خالِ زنخداں سے شفا ہو گی ہمیں

کیا کریں گے اے طبیب اس تیرے بہدانے کو ہم

باندھتے ہیں اپنے دل میں زلفِ جاناں کا خیال

اس طرح زنجیر پہناتے ہیں دیوانے کو ہم

پنجہءِ وحشت سے ہوتا ہے گریباں تار تار

دیکھتے ہیں کاکلِ جاناں میں جب شانے کو ہم

عقل کھو دی تھی جو اے ناسخ جنونِ عشق نے

آشنا سمجھا کیے اک عمر بیگانے کو ہم