ایک بحر ۔۔۔ ایک قافیہ و ایک ردیف اور 18 غزلیں
۔۔۔۔۔۔۔۔۔۔۔۔۔۔۔۔۔
عدیم ہاشمی
فاصلے ایسے بھی ہوں گے یہ کبھی سوچا نہ تھا
سامنے بیٹھا تھا میرے اور وہ میرا نہ تھا
وہ کہ خُوشبو کی طرحپھیلا تھا میرے چار سُو
میں اُسے محسوس کر سکتا تھا، چُھو سکتا نہ تھا
رات بھر پچھلی ہی آہٹ کان میں آتی رہی
جھانک کر دیکھا گلی میں، کوئی بھی آیا نہ تھا
یہ سبھی ویرانیاں اُس کے جُدا ہونے سے تھیں
آنکھ دُھندلائی ہوئی تھی، شہر دُھندلایا نہ تھا
عکس تو موجود تھا پر عکس تنہائی کا تھا
آئینہ تو تھا مگر اُس میں تیرا چہرا نہ تھا
میں تیری صورت لئے سارے زمانے میں پِھرا
ساری دُنیا میں مگر کوئی تیرے جیسا نہ تھا
خُود چڑھا رکھے تھے تن پر اَجنبیت کے غُلاف
ورنہ کب اِک دوسرے کو ہم نے پہچانا نہ تھا
سینکڑوں طوفان لفظوں کے دبے تھے زیرِ لب
ایک پتھر خامشی کا تھا ، جو ہٹتا نہ تھا
محفلِ اہلِ وفا میںہر طرح کے لوگ تھے
یا ترے جیسا نہیں تھا یا مرے جیسا نہ تھا
آج اُس نے درد بھی اپنے علیحدہ کر لیے
آج میں رویا تو میرے ساتھ وہ رویا نہ تھا
یاد کرکے اور بھی تکلیف ہوتی تھی عدیم
بھول جانے کے سوا اب کوئی بھی چارہ نہ تھا
مصلحت نے اجنبی ہم کو بنایا تھا عدیم
ورنہ کب اک دوسرے کو ہم نے پہچانا نہ تھا
۔۔۔۔۔۔۔۔۔۔۔۔۔۔۔۔۔۔۔۔۔۔
ولی عزلت
مغز بہار اس برس اس بن بچا نہ تھا
چین جبیں بن ایک گل اب کی ہنسا نہ تھا
جب لگ میں صبح حسن بتوں سے ملا نہ تھا
دل ہوئے گل سا ہات سے میرے گیا نہ تھا
کیا کی وفا کہ موج گہر سا ہے سر سے بند
خنجر جز ایک دم کا مرا آشنا نہ تھا
جا کر فنا کے اس طرف آسودہ میں ہوا
میں عالم عدم میں بھی دیکھا مزا نہ تھا
اس یار کاروانی کے وقت وداع ہائے
بے نالہ ایک اشک مرا جوں درا نہ تھا
ہوتے ہی جلوہ گر ترے اے آفتاب رو
سینے میں جیسے شبنم گل دل رہا نہ تھا
منہ موڑ بت کدہ سے حرم کو چلا ہے شیخ
عزلتؔ مگر ہے کعبہ ہی میں یہاں خدا نہ تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آزاد گلاٹی
خود ہمیں کو راحتوں کے کیف کا چسکا نہ تھا
زندگی کا زہر ورنہ اس قدر کڑوا نہ تھا
اس نے تنہائی سے گھبرا کر پکارا تو نہیں
اس سے پہلے تو مرا دل اس طرح دھڑکا نہ تھا
ہائے وہ عالم کہ ان کی بزم میں بھی بیٹھ کر
میں یہی سوچا کیا میں تو کبھی تنہا نہ تھا
اس کے اپنے ہاتھ رخساروں کو سہلانے لگے
گو بظاہر میری بابت اس نے کچھ سوچا نہ تھا
ہر طرف کھلتی رہیں کلیاں نسیم صبح سے
اپنی قسمت میں صبا کا ایک بھی جھونکا نہ تھا
زندگی اے زندگی!! آ دو گھڑی مل کر رہیں
تجھ سے میرا عمر بھر کا تو کوئی جھگڑا نہ تھا
سوچتے ہیں اب اسے آزادؔ ہم کیا نام دیں
عمر کا وہ دور دل میں جب کوئی سودا نہ تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اختر ہوشیارپوری
میں نے یوں دیکھا اسے جیسے کبھی دیکھا نہ تھا
اور جب دیکھا تو آنکھوں پر یقیں آتا نہ تھا
بام و در سے سخت بارش میں بھی اٹھے گا دھواں
یوں بھی ہوتا ہے محبت میں کبھی سوچا نہ تھا
آندھیوں کو روزن زنداں سے ہم دیکھا کئے
دور تک پھیلا ہوا صحرا تھا نقش پا نہ تھا
لوگ لائے ہیں کہاں سے شب کو مرمر کے چراغ
ان چٹانوں میں تو دن کو راستہ پیدا نہ تھا
شہر کی ہنگامہ آرائی میں کھو کر رہ گیا
میں کہ اپنے گھر میں بھی مجھ کو سکوں ملتا نہ تھا
برف اپنے آپ گھل جاتی ہے سورج ہو نہ ہو
شام سے پہلے یہ جانا تھا مگر سمجھا نہ تھا
ان دنوں بھی شہر میں سیلاب آتے تھے بہت
وادیوں میں جب کہیں بادل ابھی برسا نہ تھا
رات کی تنہائیوں میں جس سے چونک اٹھے تھے ہم
اپنی ہی آواز تھی شعلہ کوئی چمکا نہ تھا
وہ بھی سچ کہتے ہیں اخترؔ لوگ بیگانے ہوئے
ہم بھی سچے ہیں کہ دنیا کا چلن ایسا نہ تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حبیب موسوی
شب کہ مطرب تھا شراب ناب تھی پیمانہ تھا
وہ پری وش کیا نہ تھا گویا کہ جو کچھ تھا نہ تھا
سوز دل سے لب یہ ہر دم نالہ بیتابانہ تھا
ہجر ساقی میں کسی پہلو قرار اصلا نہ تھا
جلوہ گر دل میں خیال عارض جانانہ تھا
گھر کی زینت تھی کہ زینت بخش صاحب خانہ تھا
کیا کروں اب مبتلا ہوں آپ اپنے حال میں
دی تھی نعمت اس نے جب لب پر مرے شکرانہ تھا
شہرۂ آفاق ہوتی میری ازخود رفتگی
خیریت گزری کہ آنکھوں سے تجھے دیکھا نہ تھا
فصل گل میں چھوڑتا مے دیکھ کر ماہ صیام
کچھ جنوں مجھ کو نہ تھا وحشت نہ تھی سودا نہ تھا
کیا کہوں ڈر یہ ہے وہ لیلیٰ ادا رسوا نہ ہو
ورنہ مجنوں سے بھی کچھ بڑھ کر میرا افسانہ نہ تھا
گر نزاکت میں نہ ہوتا مثل تار عنکبوت
خوب الفت سے زمانہ میں کوئی رشتہ نہ تھا
یوں ضعیفی آ گئی گویا ازل سے تھے ضعیف
اور شباب ایسا گیا جیسے کبھی آیا نہ تھا
ہے یقیں عاشق تمہارا مر گیا ہو لو خبر
میں نے کل دیکھا تھا جا کر حال کچھ اچھا نہ تھا
نیم باز آنکھیں تمہارا نام تھا ورد زباں
زخم دل پر ہاتھ تھا لب پر مگر شکوہ نہ تھا
بخت کی برگشتگی گزری ہے حد سے اے حبیبؔ
دیکھتے ہیں ان کے تلوے جن کا منہ دیکھا نہ تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بمل کرشن اشک
جسم میں خواہش نہ تھی احساس میں کانٹا نہ تھا
اس طرح جاگا کہ جیسے رات بھر سویا نہ تھا
اب یہی دکھ ہے ہمیں میں تھی کمی اس میں نہ تھی
اس کو چاہا تھا مگر اپنی طرح چاہا نہ تھا
جانے والے وقت نے دیکھا تھا مڑ کر ایک بار
گو ہمیں پہچانتا کم تھا مگر بھولا نہ تھا
ہم بہت کافی تھے اپنے واسطے جیسے بھی تھے
کوئی ہم سا دوست کوئی ہم سا بیگانہ نہ تھا
اجنبی راہیں نہ جانے کس طرح آواز دیں
جب سفر پر چل پڑے تھے کس لیے سوچا نہ تھا
پاؤں کا چکر لیے پھرتا رہے گا دوستو
اور پھر سوچو گے اپنے شہر میں کیا کیا نہ تھا
ہم بھی ان راتوں میں تھالی پر دیا رکھ کر چلے
جب شوالے کی عمارت کا کوئی در وا نہ تھا
فرض کی منزل نے میری گمرہی بھی چھین لی
ورنہ اشکؔ اس رستی بستی راہ میں کیا کیا نہ تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کرشن ادیب
مدرسہ آوارگی اور ہاتھ میں بستہ نہ تھا
جو کتابوں میں ہے لکھا اس کو وہ پڑھتا نہ تھا
یوں تو دروازے کھلے تھے سارے اس کے واسطے
وہ مسافر راستوں کا ایک جا ٹھہرا نہ تھا
جو سناتا تھا کبھی آب رواں کی داستاں
اس کے ہونٹوں کا مقدر اوس کا قطرہ نہ تھا
تشنگی ہی تشنگی تھی اور صحرا کے سراب
آنکھ پانی پر تھی لیکن سامنے دریا نہ تھا
چھوڑ آیا تھا جسے میں خود انا کے زعم میں
پھر پلٹ کر اس کو میں نے عمر بھر دیکھا نہ تھا
میرے ہاتھوں میں ہے خوشبو اس کے ہاتھوں کی ادیبؔ
جسم جس کا چھو کے میں نے آج تک دیکھا نہ تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عارف شفیق
گھر سے چیخیں اٹھ رہی تھیں اور میں جاگا نہ تھا
اتنی گہری نیند تو پہلے کبھی سویا نہ تھا
نشۂ آوارگی جب کم ہوا تو یہ کھلا
کوئی بھی رستہ مرے گھر کی طرف جاتا نہ تھا
کیا گلہ اک دوسرے سے بے وفائی کا کریں
ہم نے ہی اک دوسرے کو ٹھیک سے سمجھا نہ تھا
گل نہ تھے جس میں وہ گلشن بھی تھا جنگل کی طرح
گھر وہ قبرستان تھا جس میں کوئی بچہ نہ تھا
آسماں پر تھا خدا تنہا مگر عارف شفیقؔ
اس زمیں پر کوئی بھی میری طرح تنہا نہ تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جمیل نظر
وہ مری دنیا کا مالک تھا مگر میرا نہ تھا
میں نے اس انداز پر پہلے کبھی سوچا نہ تھا
ایک مدت تک رہا خوش فہمیوں میں مبتلا
آئینے کے روبرو جب تک مرا چہرہ نہ تھا
تہمتوں کو ایک ایسے اجنبی کی تھی تلاش
جو کبھی گھر سے نکل کر راہ میں ٹھہرا نہ تھا
ہو چکی تھی شہرتیں رسوائیوں سے ہمکنار
بھول جاتا میں جسے وہ سانحہ ایسا نہ تھا
میری نظروں میں ہے خاکہ وہ بھی حسن دوست کا
جس کو لوگوں نے ابھی تک ذہن میں سوچا نہ تھا
میں اٹھوں تو رنگ لائیں تذکروں کے سلسلے
لوگ اتنا تو کہیں کہ آدمی اچھا نہ تھا
لوگ اس انداز میں دیتے ہیں دنیا کی مثال
میں تو جیسے تجربوں کے دور سے گزرا نہ تھا
اک نیا احساس دیتے ہیں وہ اہل سنگ کو
آبرو کے ساتھ رہنا شہر میں اچھا نہ تھا
کیا اثر انداز ہوتا اس پہ افسانہ نظرؔ
لفظ بھی مانگے ہوئے مفہوم بھی اپنا نہ تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عتیق انظر
جس کی خاطر میں نے دنیا کی طرف دیکھا نہ تھا
وہ مجھے یوں چھوڑ جائے گا کبھی سوچا نہ تھا
اس کے آنسو ہی بتاتے تھے نہ اب لوٹے گا وہ
اس سے پہلے تو بچھڑتے وقت یوں روتا نہ تھا
رہ گیا تنہا میں اپنے دوستوں کی بھیڑ میں
اور ہمدم وہ بنا جس سے کوئی رشتہ نہ تھا
قہقہوں کی دھوپ میں بیٹھے تھے میرے ساتھ سب
آنسوؤں کی بارشوں میں پر کوئی بھیگا نہ تھا
اشک پلکوں پے بچھڑ کر اپنی قیمت کھو گیا
یہ ستارہ قیمتی تھا جب تلک ٹوٹا نہ تھا
مرمریں گنبد پہ رکتی تھی ہر اک پیاسی نظر
پر کسی نے مقبرے میں غم چھپا دیکھا نہ تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
احمد نثار
عشق میں برباد ہونے کے سوا رکھا نہ تھا
غم کو سہنے کے علاوہ کوئی بھی چارہ نہ تھا
یاد رہ رہ کر کسی کی ہے ستاتی رات بھر
صبح ہوتے بھول جانا یہ تجھے شیوہ نہ تھا
یہ تری الفت مجھے رکھتی ہے بیتابی میں گم
یہ سبھی کو تھی خبر لیکن کوئی چرچا نہ تھا
آئینہ دیکھوں تو کیوں تو ہی نظر آئے مجھے
بولتا ہے کیا ترا چہرہ میرے جیسا نہ تھا
دن گزر جاتا ہے دنیا کی مسافت میں مگر
رات ہی اک امتحاں ہے جس کا اندازہ نہ تھا
رات کی تنہائیاں آغوش میں لے کر مجھے
پوچھتی ہیں کیا کبھی تنہائیاں دیکھا نہ تھا
کیا محبت وہ نشہ ہے میں ذرا جانوں نثارؔ
زندگی میں اس طرح پہلے کبھی بہکا نہ تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عارف عبدالمتین
تتلیاں رنگوں کا محشر ہیں کبھی سوچا نہ تھا
ان کو چھونے پر کھلا وہ راز جو کھلتا نہ تھا!
تو وہ آئینہ ہے جس کو دیکھ کر روشن ہوا
میں نے اپنے آپ کو سمجھا کہاں دیکھا نہ تھا!
چاند بن کر تو مرے آنگن میں اترا ہے ضرور
نور اتنا بام و در پر آج تک بکھرا نہ تھا!
کون سے عالم میں میں نے آج دیکھا ہے تجھے
تو دھنک بن کر مرے دل میں کبھی اترا نہ تھا!
سخت جانی سے مرا دل بچ گیا ورنہ یہاں
کون سا پتھر تھا اس شیشے پہ جو برسا نہ تھا!
اس جہان رنگ و بو کو میں نے سمجھا تھا سراب
اک حقیقت تھا یہ عارفؔ آنکھ کا دھوکا نہ تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اقبال اشہر
پیاس کے بیدار ہونے کا کوئی رستہ نہ تھا
اس طرف بادل نہیں تھے اس طرف دریا نہ تھا
رات کی تاریکیاں پہچان لیتی تھیں اسے
روح کی آواز تھا وہ جسم کا سایہ نہ تھا
تیری یادیں تو چراغوں کی قطاریں بن گئیں
پہلے بھی گھر میں اجالا تھا مگر ایسا نہ تھا
چند قطروں کے لئے دریا کو کیوں تکلیف دی
میری جانب دیکھ لیتے میں کوئی صحرا نہ تھا
رات آئی تو چراغوں کی بڑی تعظیم تھی
اور جب گزری تو کوئی پوچھنے والا نہ تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نیاز حسین لکھویرا
اک وہ بھی دن تھے تجھ سے مرا رابطہ نہ تھا
سنجیدگی سے تیرے لیے سوچتا نہ تھا
نفرت ملی تو زعم وفا ٹوٹ ٹوٹ کر
بکھرا کچھ اس طرح کہ کوئی واسطہ نہ تھا
کمرے میں پھیلتی ہی گئی روشنی کی لہر
کرنوں کا جال تھا کہ کہیں ٹوٹتا نہ تھا
دیکھا تجھے تو چاند بھی پیڑوں میں چھپ گیا
ویسے تو شہر بھر میں کوئی چاند سا نہ تھا
وہ اپنی ذات میں ہی مقید رہا نیازؔ
سب دیکھتے تھے اس کو کوئی ڈھونڈھتا نہ تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عبدالصمد تپشؔ
آنکھ تھی سوجی ہوئی اور رات بھر سویا نہ تھا
اس طرح وہ ٹوٹ کر شاید کبھی رویا نہ تھا
ان کے شوق دید میں تھا اس قدر کھویا ہوا
میں بھری محفل میں تھا ایسا کہ میں گویا نہ تھا
امتحاں ذوق سفر کا تھا تو سورج سر پہ تھا
دھوپ تھی دیوار تھی لیکن کہیں سایہ نہ تھا
وہ بڑا تھا پھر بھی وہ اس قدر بے فیض تھا
اس گھنیرے پیڑ میں جیسے کوئی سایہ نہ تھا
شاہراہ پر خون میں اک لاش تھی لتھڑی ہوئی
آئے دن کا حادثہ تھا اس لئے چرچا نہ تھا
ہر نگہ پیاسی تھی لیکن وقت کی تحویل میں
اک سراب آسا زمیں تھی دور تک دریا نہ تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عطا عابدی
سر پہ سورج ہو مگر سایہ نہ ہو ایسا نہ تھا
پہلے بھی تنہا تھا لیکن اس قدر تنہا نہ تھا
وہ تو یہ کہیے غم دوراں نے رکھ لی آبرو
ورنہ دل کی بات تھی کچھ کھیل بچوں کا نہ تھا
بچ کے طوفاں سے نکل آیا تو حیرانی ہے کیوں
گو سفینہ ڈوبتا تھا حوصلہ ٹوٹا نہ تھا
آپ آئے تو یقیں کرنا پڑا ورنہ یہاں
رات کو سورج کبھی افلاک پر نکلا نہ تھا
شہر دلی آئینہ خانہ ہے لیکن اے عطاؔ
جال تو خوش فہمیوں کا آپ کو بننا نہ تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
فاروق مضطر
سوچ بھی اس دن کو جب تو نے مجھے سوچا نہ تھا
کوئی دریا دشت کے اطراف میں بہتا نہ تھا
اس کو کب فرصت تھی جو چہروں کو پڑھتا غور سے
ورنہ سطح آئنہ کا ہر ورق سادہ نہ تھا
جانے کیوں اب رات دن گھر میں پڑا رہتا ہے وہ
پہلے یوں خود میں کبھی سمٹا ہوا رہتا نہ تھا
خوشبوؤں رنگوں کو پی لیتی ہے آکر زرد شام
پیڑ ہے اندیشۂ انجام تو سوکھا نہ تھا
شاہراہوں سے گریزاں ہے مگر کچھ سوچ کر
عادتاً پہلے تو وہ پگڈنڈیاں چلتا نہ تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
رضیہ حلیم جنگ
میں مبتلائے عشق ہوں مجھ کو پتا نہ تھا
جب تک کسی نے حال یہ میرا کیا نہ تھا
پایا ہے جب سے تجھ کو ہے تکمیل کا سرور
میں تھی ادھوری تو مجھے جب تک ملا نہ تھا
اللہ تیرے عشق میں ہوں حال سے بے حال
تب تک بڑے مزے میں تھی جب دل لگا نہ تھا
0 comments:
Post a Comment