ايک رديف دو شاعر

شکیل بدایونی

اب وہ خود محوِ علاج دردِ پنہاں ہو گئے

اے خوشا قسمت کہ پھر جینے کے ساماں ہو گئے

سوچ تو لیتے آئینے میں کس کا عکس ہے

اک ذرا سی بات پر اس درجہ حیراں ہو گئے

میں تو سمجھا تھا کہ یہ بھی اک فریبِ حسن ہے

اُف رے غیرت وہ تو سچ مچ پیشیماں ہو گئے

دید کے قابل ہے فیضِ رہ نور دانِ جنون

خارد دامن سے اُلجھ کر گل بداماں ہو گئے

صدقہ جاں سوز ی فرقت تو مجھ پر بار تھا

میری حالت دیکھ کر تم کیوں پریشاں ہو گئے

کون رکھے گا جہاں میں کفرِ سامانی کی لاج

عشق میں ہم جیسے کافر جب مسلماں ہو گئے

حضرت واعظ جہاں کی لذتوں سے کیوں ہو دور

وہ فرشتہ خصلتی کیسی ، جب انساں ہو گئے

عہدِ فروا ، اک بہانہ ہی سہی لیکن شکیل

اس بہانے سے سکونِِ دل کے ساماں ہو گئے

عرفان احمد میر

خندگی خوش لب تبسم مثل ارماں ہو گئے 

عہد بے غم جوں ہی آیا ہم پریشاں ہو گئے

آگے تھی ہم کو قرابت شب سے شب کو ہم سے تھی 

ان کو تھی خلوت سے رغبت ہم شبستاں ہو گئے

ہائے یہ عجز و نیاز مے کشاں بھی کم نہیں 

آہ کیا بھر لی کہ ہم خاک‌‌ گلستاں ہو گئے

کیا تری محفل کی ہے یہ ارتجالی اے خدا 

سانس کی فرصت نہ دی اور عہد و پیماں ہو گئے

کیا کریں شکوہ تری بے اعتدالی سے رقیب 

وہ بلائے بھی نہ آئے آپ مہمان ہو گئے

یاد ہے ہم کو جنون لا فنا کی لغزشیں 

ہم میں تھی موجیں کبھی اب دشت ویراں ہو گئے

رکھ لیا ساقی نے میری خستگی کا یہ بھرم 

شیخ کی مجلس میں ہم پستی کا ساماں ہو گئے

تیرے کاکل کی درازی ہو کہ زلفوں کا ستم 

ہم نے آنکھیں ان سے موندیں بھی تو زنداں ہو گئے

تیری قامت پر فدا ہو کیا کہ لب پر افتخار 

تیری انگشت حنائی پر ہی قرباں ہو گئے

آہ وہ بالغ ترا مشہور فہوائے کلام 

بلبلوں نے ہم کو دیکھا کل تو حیراں ہو گئے