احمد ندیم قاسمی

احمد ندیم قاسمی

ہر لمحہ اگر گریز پا ہے

تُو کیوں مرے دل میں بس گیا ہے

چلمن میں گلاب کھِل رہا ہے

یہ تُو ہے کہ شوخیء صبا ہے

میں نے تجھے دیکھا جب سے پیارے

ہر چیز پہ، پیار آ رہا ہے

میری تیرے کہے سے چپ ہوں لیکن

چپ بھی تو بیانِ مدعا ہے

ہر دیس کی اپنی اپنی بولی

صحرا کا سکوت بھی صدا ہے

اک عمر کے بعد مسکرا کر

تُو نے تو مجھے رُلا دیا ہے

اُس وقت کا میں حساب کیا دوں

جو تیرے بغیر کٹ گیا ہے

رونے کو اب اشک بھی نہیں ہیں

یا عشق کو صبر آ گیا ہے

اب کس کی تلاش میں ہیں جھونکے

میں نے تو دیا بُجھا دیا ہے

کچھ کھیل نہیں ہے عشق کرنا

یہ زندگی بھر کا رت جگا ہے