معراج فیض آبادی

ہم غزل میں ترا چرچا نہیں ہونے دیتے

تیری یادوں کو بھی رُسوا نہیں ہونے دیتے

کچھ تو ہم خود بھی نہیں چاہتے شہرت اپنی

اور کچھ لوگ بھی ایسا نہیں ہونے دیتے

عظمتیں اپنے چراغوں کی بچانے کے لئے

ہم کسی گھر میں اُجالا نہیں ہونے دیتے

آج بھی گاؤں میں کچھ کچے مکانوں والے

گھر میں ہمسائے کے فاقہ نہیں ہونے دیتے

ذکر کرتے ہیں ترا نام نہیں لیتے ہیں

ہم سمندر کو جزیرہ نہیں ہونے دیتے

مجھ کو تھکنے نہیں دیتا یہ ضرورت کا پہاڑ

میرے بچے مجھے بوڑھا نہیں ہونے دیتے

اسی تھکے ہوئے دستِ طلب سے مانگتے ہیں

جو مانگتے نہیں رب سے، وہ سب سے مانگتے ہیں

وہ بھیک مانگتا ہے حاکموں کے لہجوں میں

ہم اپنے بچوں کا حق بھی ادب سے مانگتے ہیں

میرے خدا اُنہیں توفیقِ خودشناسی دے

چراغ ہو کہ اُجالا جو شب سے مانگتے ہیں

وہ بادشاہ اِدھر مڑ کہ دیکھتا ہی نہیں

ہم اپنے حصے کی خیرات کب سے مانگتے ہیں

میں شاہزادہ غربت، امیرِ دشتِ اَنا

یہ لوگ کیا میرے نام و نسب سے مانگتے ہیں