مجید امجد

کوئی تو مجھ کو بتائے یہ راہگیر ہے کون

حسین انکھڑیوں میں حسن شش جہات لئے

دمِ سحر ہے سر رہگزار محوِ سفر

سیاہ گیسوؤں میں بے کسی کی رات لئے

چلی ہے کونسی دنیائے بے نشاں کی طرف

ہزار گردشِ افلاک سات سات لئے

جبینِ ناز پہ درد مسافری کا ہجوم

پلک پلک پہ غبارِ رہِ حیات لئے

اداس چہرے پہ اک التجا کی گویائی

خموش لب پہ کوئی بے صدا سی بات لئے

خزاں کی سلطنتوں میں ہے ایک پھول رواں

ہر ایک خار سے امید التفات لئے

لگی ہے اس کو لگن جانے کس زمانے کی

بھٹک گئی نہ ہو ٹھوکر کوئی زمانے کی

مجید امجد

دل سے ہر گزُری بات گزُری ہے 

کِس قیامت کی، رات گزُری ہے 

چاندنی، ۔۔ نیم وا دریچہ، سکوت 

آنکھوں آنکھوں میں رات گزُری ہے 

ہائے وہ لوگ، خُوب صُورت لوگ

جن کی دُھن میں حیات گزُری ہے 

کسی بھٹکے ہوئے خیال کی موج 

کتنی یادوں کے سات۔ گزُری ہے

تمتماتا ۔۔ہے ۔۔ چہرۂ ۔۔ ایّام !

دل پہ کیا واردات گزُری ہے

پھر کوئی آس لڑکھڑائی ہے

کہ، نسیمِ حیات گزُری ہے

بُجھتے جاتے ہیں دُکھتی پلکوں پہ دِیپ

نیند آئی ہے، رات گزُری ہے 

جب اک چراغِ راہگزار کی کرن پڑے - مجید امجد

جب اک چراغِ راہگزار کی کرن پڑے

ہونٹوں کی لو لطیف حجابوں سے چھن پڑے

شاخِ ابد سے جھڑتے زمانوں کا روپ ہیں

یہ لوگ جن کے رخ پہ گمانِ چمن پڑے

تنہا گلی، ترے مرے قدموں کی چاپ، رات

ہر سو وہ خامشی کہ نہ تابِ سخن پڑے

یہ کون سے دیار کی ٹھنڈی ہوا چلی

ہر موجہء خیال پہ صد ہا شکن پڑے

جب دل کی سل پہ بج اٹھے نیندوں کا آبشار

نادیدہ پائلوں کی جھنک جھن جھنن پڑے

یہ چاندنی یہ بھولی ہوئی چاہتوں کا دیس

گزروں تو رشحہء عطرِ سمن پڑے

یہ کون ہے لبوں میں رسیلی رتیں گھلیں

پلکوں کی اوٹ نیند میں گلگوں گگن پڑے

اک پل بھی کوئے دل میں نہ ٹھہرا وہ رہ نورد

اب جس کے نقشِ پا ہیں چمن در چمن پڑے

اک جست اس طرف بھی غزالِ زمانہ رقص

رہ تیری دیکھتے ہیں خطا و ختن پڑے

جب انجمن تموجِ صد گفتگو میں ہو

میری طرف بھی اک نگہِ کم سخن پڑے

صحرائے زندگی میں جدھر بھی قدم اٹھیں

رستے میں ایک آرزوؤں کا چمن پڑے

اس جلتی دھوپ میں یہ گھنے سایہ دار پیڑ

میں اپنی زندگی انھیں دے دوں جو بن پڑے

اے شاطرِ ازل ترے ہاتھوں کو چوم لوں

قرعے میں میرے نام جو دیوانہ پن پڑے

اے صبحِ دیر خیز انھیں آواز دے جو ہیں

اک شام زود خواب کے سکھ میں مگن پڑے

اک تم کہ مرگ دل کے مسائل میں جی گئے

اک ہم کہ ہیں بہ کشمکشِ جان و تن پڑے

امجد طریق مے میں ہے یہ احتیاط شرط

اک داغ بھی کہیں نہ سرِ پیرہن پڑے